Griichesch léieren

Natierlech probéiert ee sech e Virsaz ze huelen, deen ee selwer och als machbar ugesäit. Ma bei dëser Challenge kéint et mol schwéier ginn.

© Unsplash

Den 2. Januar 2020 hunn d’Jackie an ech eis eng e bësse méi speziell Challenge gesat. An zwar wëlle mer allen 2 eng nei Sprooch léieren. Dat soll keng ze einfach sinn a virun allem keng, déi enger Sprooch, déi mer scho kënnen, änelt.

Sou ass et komm, dass d’Jackie Russesch an ech Griichesch léiere mussen.

Mir challengen eis vun Zäit zu Zäit. Esou ass et de Méindeg, de 6. Januar schonn un der éischter Challenge: Mir mussen allen 2 an eiser neier Sprooch bis 10 ziele kënnen. Ob mer dat meeschteren oder net, gitt der am Eldo-Afterwork vu méindes bis freides tëscht 15h50 an 19h50 gewuer. Ech fir mäin Deel si gutt preparéiert, d’Zuele sëtzen an d’Challenge ka kommen!

Challenge Nummer 1: Op Griichesch bis 10 zielen

Et seet ee jo dacks: "Du kanns mol net bis 10 zielen!" - an dat war effektiv mol eng Kéier eng Erausfuerderung. Mäi Virdeel war hei natierlech, dass d'Zuelen extrem kuerz waren. 

Ech hu mech mat YouTube-Videoen ausernee gesat an och en Online-Iwwersetzer mat dobäi geholl an dunn ass dat zimmlech féx gaangen. Natierlech ass mer bewosst, dass déi nächst Aufgaben net esou einfach ginn. 

Ech sinn awer optimistesch a setze mech dohannert.




Challenge Nummer 2: Sech op Griichesch virstellen

Also ech ka scho mol direkt soen, dass dës Challenge wierklech e gutt Stéck méi schwéier war. Iwwer YouTube konnt ech mer zwar ulauschtere wéi een de Saz richteg ausschwätzt, allerdéngs misst ech nach mat e puer Online-Iwwersetzer schaffen, fir de Saz eben op mech unzepassen, wéi zum Beispill den Alter.

Schlussendlech ass et wierklech gutt gaangen, mee muss éierlech gestoen, dass déi éischt Challenge besser gaangen ass. Mengen ech muss mech bei der nächster nach méi investéieren, well do musse mer méi fléissend schwätzen, oder fir et anescht auszedrécken, d'Meteo muss op Griichesch sinn. 

Ech si gespaant wat dobäi eraus kënnt. 

Adío

Challenge Nummer 3: Meteo op Griichesch

Don Donneschdeg, den 9. Januar war et da richteg interessant. D'Meteo op Griichesch. 
Natierlech hunn ech mer do eng grouss Hëllef zur Hand geholl an zwar eng Persoun déi perfekt Griichesch schwätzt. Wat ech genau soe muss hunn ech a Form vun enger Audiodatei, elo muss ech dat ganzt nach iergendwéi op de Pabeier kréien, fir et auswenneg ze léieren. 

No der Challenge:

Also, d’Auswenneg léieren huet sech definitiv als schwiereg erausgestallt. Hu mer alles misste phonetesch opschreiwen, well ech soss net wéisst wéi ech dat alles ausschwätze soll.

Ech si mam Resultat awer ganz zefridden an et huet richteg Spaass gemaach. Ech freeë mech elo schonn op déi nächst Woch. Do geet et da mat der nächster Challenge weider. Wat ech elo scho ka soen ass, dass et musikalesch gëtt.

Adío




Challenge Nummer 4: Griichesch Nationalhymne

Eppes kann ech elo scho mol soen. Hei kommen 2 Hürden op mech duer. Fir d'éischt mol ewéi gewinnt dat Griichescht an zweetens, de Gesang. Ech sinn elo wierklech net dee beschte Sänger an d'Nationalhymne vu Griicheland kléngt e bësse wéi Operngesang.

Gottseidank sange mer hei net déi Ganz, mee nëmmen en Deel. 

Da gëtt elo mol d'Stëmm geuelegt.

Penibel, penibel, penibel, méi kann ech dozou net soen. Vum Text hier war et net schwiereg, de war jo virginn. Mee mäi Gesang war grujeleg. Am Studio selwer huet et sech nach ganz ok unhéieren, wéi ech dat Ganzt allerdéngs dono selwer eng Kéier héieren hunn, hunn déi Leit, déi sech dat hu missten unhéieren, mer richteg leed gedoen.

Ech kann iech awer scho mol berouegen, well et kënnt näischt méi mat Sangen. Déi nächst Challenge ass nees bësse méi intensiv, wat d'Sprooch ugeet. Ech muss nämlech e Lidd op griichesch umoderéieren.

Challenge Nummer 5: E Lidd op griichesch umoderéieren

Kalimèra

Ítan mia plíri epitychía. ...

Ohh pardon, war elo nach ëmmer am griicheschen dran. D'Challenge war e vollen Erfolleg. Mir perséinlech huet dat extrem gutt gefall, well ech déi griichesch Sprooch komplett an d'Sendung konnt integréieren. Hunn esou geschwat wéi wann ech ganz normal e Lidd géing umoderéieren, just mam groussen Ënnerscheed, dass et net op Lëtzebuergesch mee op Griichesch war.
Eppes kann ech iech verroden, déi nächst Aufgab ass nach ganz ok, mee déi lescht, déi huet et a sech. Wat dat genau ass, gitt der nach fréi genuch gewuer.

Challenge Nummer 6:

Et ass déi zweet lescht Challenge an ech gesinn déi e bëssen als d'Rou virum Stuerm. No den News um 10 fir, muss ech dann déi Stonn déi kënnt op Griichesch umoderéieren. Ass e bëssen d'nämmlecht wéi d'Challenge mam Lidd an dofir gesinn ech déi als ganz relax un.

Wat op eisem leschten Dag als Challenge um Programm steet, mécht mech elo schonn nervös. Do muss ech mäin aktuellt Wëssen, wat déi griichesch Sprooch ugeet, ënner Beweis stellen an dat net einfach just andeems ech e puer Sätz op Griichesch soen, mee an enger Konversatioun mat engem Griich, dee soss keng aner Sprooch wéi Griichesch schwätzt. 

Wéi dat wäert ausgesinn, gitt der no der aktueller Challenge gewuer.

Challenger Nummer 7:

Haut ass, ganz éierlech gesot, déi Challenge déi am witzegste gëtt. Ech hu mer nämlech virgeholl an e Griichesche Restaurant unzeruffen a mer 50 Kilo Sardellen ze bestellen. Dat maachen ech awer net hei zu Lëtzebuerg mee zu Athen. Ech hunn do nämlech e gudde Fëschrestaurant fonnt, wou ech da wäert uruffen. Elo muss ech mer nach eppes preparéiere fir, dass wann déi Persoun um Telefon mam Griichesche lassleet, ech net wéi en Däämlech do stinn. Mee dat kréien ech hin.

Fazit:

D'Challenge ass elo offiziell eriwwer an ech ka soen, dass et wierklech Spaass gemaach huet. Et ass och kee Geheimnis, dass déi lescht Challenge déi war, déi wierklech am meeschten Iwwerwannung kascht huet. Ech hunn nämlech missten a Griicheland, op Athen an e Fëschrestaurant uruffen a mech op Griichesch mat der Persoun um Telefon ënnerhalen. 
Am Ufank hunn ech mer geduecht, dass dat eng grouss Katastroph géing ginn, ma dat war allerdéngs net de Fall. Et huet richteg Spaass gemaach an et ass och effektiv eng kleng Konversatioun entstanen.

Also mäi Virsaz fir dëst Joer hunn ech scho mol duerchgezunn.