GeldwäschZuel vu Verdachtsfäll 2016 op iwwer 30'000 gewuess

Wéi d'CRF am Joresrapport schreift, géif des Hausse vun 178,6% awer net ganz iwwerraschend kommen.

Leschten Update: 15.11.2017, 04:37:07

Aus dem Joresrapport vun der „Cellule de renseignement financier“, kuerz CRF, geet ervir, dass d'Zuel vu Verdachtsfäll wat Wirtschafts-a Finanzkriminalitéit ugeet ëm 178,6% am Joer 2016 par Rapport zu 2015 geklommen ass.

30'710 Fäll goufen der CRF deemno gemellt, et waren dëst bal nëmme Fäll vu Geldwäscherei. 70 Fäll goufen wéinst dem Verdacht op déi méiglech Finanzéierung vun Terrorismus traitéiert. Domat sinn et der 19'687 méi wéi nach am Virjoer.

Wéi den CRF, deen dem Parquet Lëtzebuerg am Beräich vun der Finanz- a Wirtschaftskriminalitéit ënnergeuerdent ass matdeelt wier dëst awer net weider iwwerraschend. Déi grouss Mass u Fäll wier nämlech op een eenzegen Acteur aus der digitaler Finanzwirtschaft zeréckzeféieren. Deen hätt sech viru kuerzem zu Lëtzebuerg niddergelooss an dofir missten elo all Verdachtsfäll aus den 28 EU-Memberstaaten zu Lëtzebuerg gemellt ginn.