Concerts presentéiert vun Eldoradio

James Morrison: 30.5. @ Atelier

30.04.2012, 09:32 - Fir d'lescht aktualiséiert: 30.04.2012, 11:10

Den James Morrison kënnt zu Rugby/ an England op d'Welt. Säi Papp huet d'Famill verlooss, seng Mamm geet schaffen. Den James ass zesummen mat Brudder a Schwëster op sech eleng gestallt. An trotzdem: d'Musek kënnt net ze kuerz, seng Plackesammlung ëmfaasst alles vun Van Morrison iwwer Pink Floyd bis hin zu Stevie Wonder.

Mat 13 weist säi Monni him, wéi een ee Blues-Riff op enger Gittar spillt. Den James Morrison gëtt Stroossemuseker a léiert do, viru gréissere Mënschemassen ze spillen ouni nervös ze ginn. Nuets lauschtert hie vill Musek, Marvin Gaye an Otis Redding.

Duerch Zoufall kritt hien ee Plackekontrakt mat Polydor, hei sinn se all vu sengem Demo-Band absolut begeeschtert.

Seng Single "You Give Me Something" entpuppt sech als absoluten Hit. Ufank August lant säin Album "Undiscovered" op Plaz 1 vun de briteschen Charts: 300.000 verkaaften Unitéiten bedeiten als éischt mol Platin.

Mat sengem zweeten Album "Songs For You, Truths For Me", zwee Joer méi spéit, kann den James Morrison den Erfolleg vum Debüt widderhuelen. Besonnesch den Duo mam Nelly Furtado, "Broken Strings", gëtt e Risesuccès.

Am Oktober 2011 kënnt den Album Nummer 3: "The Awakening". mat deem kënnt den James Morrison den 30. Mee an den Atelier.

Weider Infos kritt der op www.atelier.lu