Mister Science

Firwat ass d’Waasser ëmmer beim Bauch am keelsten?

Et gëtt sou lues Summer an da geet jo sou muncheree vun eis gären an daat kalt Stauwaasser schwammen - naja jiddwerengem seng Freed. Dir kennt et awer vläicht, dat Gefill wann ee sech lues an d’Waasser viruntaascht: fir d’éischt mat de Féiss da mat de Been, jo an da kennt de grousse Schock: De Bauch! Do ziddert een am meeschten. Me wourunner läit dat eigentlech datt d’Waasser beim Bauch am keelsten ass, Mister Science?

Majo d'Gefill dat et eis kal oder waarm ass, kennt doduerch datt eise Kierper eng Temperaturdifferenz spiert. Am beschte versteet een dat mat engem Experiment: Dir huelt 3 Schosselen a fëllt déi éischt mat waarme Waasser eng zweet mat kalem an déi drëtt mat wodelechem Waasser. Dann taucht der déi lenks Hand an d’waarmt an déi riets Hand an kaalt Waasser a waart 30 Sekonnen. Duerno taucht der déi 2 Hänn an d’wodelecht Waasser. Fir déi lenks Hand déi waarm ass fillt seet d’Waasser kal un, awer déi riets Hand seet et wier waarm. Kal a waarm ass also relativ, an hängt dovun of wéi waarm eise Kierper as.

Jo a wisou gëtt et eis da elo kal wa mir mam Bauch an d’Waasser ginn?

Majo, de Bauch ass e Kierperdeel dee méi waarm as wéi de Rescht well hei eis Verdauungsorganer vill Hëtzt produzéieren. Eis Hänn a Féiss sinn Extremitéiten déi méi kal sinn, well se och manner duerchbludd ginn. Wa mer an d’Waasser gin spiert de Bauch e méi groussen Temperaturënnerscheed wéi d’Féiss, an dofir fillt sech d’Waasser fir de Bauch méi kal un.

 

Logesch, me so, nach eng ondiskret Fro, verschidde vu menge männleche Kollege schuddere sech schonn ier se bei de Bauch kommen. Ass hiert beschte Stéck dann och sou waarm wéi de Bauch?

Nee meeschtens sinn d’Geschlechtsorganer och méi kal wéi de Bauch me doduerch datt mir do vill méi Nervenzellen hun, reagéiert een hei méi sensibel op d’Keelt.

Fuerschung zu Lëtzebuerg

Op der Uni-Lëtzebuerg fuerscht d’Équipe ronderëm de Fernand Anton an der Neurophysiologie. An enger aktueller Publikatioun am „European Journal of Pain“ hun si d’Effekter an d’Schmäerze beschriwwen déi e Mënsch spiert wann e mat ganz waarme Waasser oder mat kalen Temperaturen a Kontakt kënnt.

Links:

http://publications.uni.lu/record/4262

Lauschtert hei nach emol den Extrait aus dem Wencke senger Sendung:

Hudd dir eng Fro ? Da stellt se dem Mister Science op science@eldoradio.lu