Mister Science
Firwat geet e Schëff, wat dausenden Tonne weit, net ënner?
Eng Nolauschterin ass op d‘Musel spazéieren gaangen an huet sech gewonnert wisou déi grouss metalle Schëffer eigentlech net ënner ginn, an zousätzlech och nach sou vill kënnen droen – Kuelen, Autoen asw... Duerno huet hatt sech gefrot op des Schëffer hier ganz Laascht och kinnten droe wann se net am Waasser géife stoe me u Land?
Wéivill e Schëff droe kann hängt dovunner of wéivill Waasser duerch d’Form vum Schëff verdrängt ka ginn. Do musst der iech lo en Experiment virstellen. Dir fëllt en dënne Plastiksbecher, dee bal näischt wéit, hallef mat Waasser, a loosst dësen an enger grousser Schossel voll Waasser schwammen. Da gesidd der dat de Niveau vum Waasser am Becher selwecht héisch ass wéi de Niveau baussen dem Becher. D’Gewiicht wat verdrängt gëtt ass also d’selwecht wéi Gewiicht wat gedroe gëtt. E klengt Schëff wat 1000 kg weit muss sou geformt sin, datt et op d’mannst 1000 Liter Waasser verdränge kann, soss geet et ënner! D’Form vum Scheffsbauch ass dobäi net sou wichteg
Géif dann e Schëff wat matt senger ganzer Charge u Land steet zesummebriechen?
Dat hängt dovunner of wéi d’Schëff u Land steet, wann et, wéi normalerweis wann et gefleckt gëtt, einfach op e puer Stäipen an der Wäerft steet, da giffen des Stäipe sech sécher duerch d’Gewiicht an de Bauch vum Schëff erandrécken. Steet d’Schëff awer op enger glater Wiss déi d’Form huet vum Bauch vum Schëff, misst d’Schëff eigentlech duerhalen.
Archimedes Prinzip
Den Archimedes ass e berühmte Mathematiker a Physiker, deen ëm 250 viru Christus gelieft huet. Hien huet als éischten de Phenomen vum Opdriff am Waasser korrekt beschriwwen, wat deemools schonn de Schëffingénieuren zegutt koum. Hien huet erausfonnt datt den Opdriff am Waasser proportional zum Volumen ass vun engem Kierper.
E Kilo Holz z.B. huet méi e grousse Volume wéi e Kilo Bläi an dofir ass den Opdriff beim Holz méi staark!- D‘Wëssenschaftler soen datt d’Holz eng manner héich Dichte huet.
Enger Legend no sollt den Archimedes dem Kinnik seng Kroun analyséieren a kucken op se echt wier. De Kinnik hat sengem Goldschmatt e Barren Gold ginn, an dëse sollt him eng Kroun domadder maachen. D’Kroun hat duerno och genau dat d’selwecht Gewiicht wéi de Goldbarren am Ufank, me de Kinnek huet gemengt datt hien en Deel vum Gold duerch en aanert méi bëllegt, Material ersat huet. Den Archimedes sollt dat beweisen.
Wann d’Kroun aus engem anere Material ass wéi Gold kann de Volume vun der Kroun net dee selwechte sinn, wéi de vum pure Goldbarren. Doduerch ännert och den Opdriff am Waasser. Hien huet d’Kroun nach emol ënner Waasser gewien an huet festgestallt datt d’Kroun am Waasser manner gewien huet wéi de Goldbarren.
D’Material war also een anert. An de Goldschmatt gouf gehaangen.
Lauschtert hei nach emol den Extrait aus dem Wencke sénger Sendung:
Hudd dir eng Fro ? Da stellt se dem Mister Science op science@eldoradio.lu
