22.02.2012, 14:58 - Fir d'lescht aktualiséiert: 22.02.2012, 15:49
Gëschter waren se also: D'BRIT Awards 2012! Wéi ëmmer goufen et déi eng oder aner Iwwerraschung awer natierlech och e klengen Skandal - sou wéi sech dat fir eng anstänneg international Veranstaltung gehéiert. Mee niewent all de Stars ass et och als Normalstierflechen méiglech bei der Präisverleihung derbäi ze sinn. Mat der richteger Kreditkaart a genuch Penner drop kann een sech eng vun de Platzen am ieweschten Block vun der Arena kaafen.
Ech hat déi grouss Chance dëst Joer een vun den Ticketen ze ergatteren a konnt dun live bei de BRIT Awards 2012 derbäi sin. Obwuel d'O2 Arena natierlech grouss ass, ass se nach laang net sou riesech wéi se an der Telé ëmmer riwerkennt - an dat obwuel ech an der zweetleschter Rei sutz!
Lauschtert hei de Reportage:
Fir dass herno alles sou ofleeft wéi dat geplangt ass, hu mär virun der Show emol fir d'éischt missen Applaus üben. Mee anscheinend waren mär net ganz esou gutt wéi se dat vun eis erwaard hunn, well permanent gouf zousätzlechen Applaus iwwert Band bäigemëscht.
D'Optrëtter waren zimlech ofwiesslungsräich - och an hirer Qualitéit. Den Highlight war op jidder Fall d'Performance vum Florence + the Machine direkt am Ufank vun der Show. Och d'Adele huet, natierlech wéi ëmmer, eng grandios Leeschtung geliwwert. Am Géigesaz dozou hunn sech d'Rihanna an den Noel Gallagher schwéier gedoen d'Téin ze treffen. Dass ech mat der Meenung net alleng war gouf mär doduerch bestätegt, dass besonnesch vill Leit während deenen Optrëtter op d'Toilette verschwonne sinn.
Déi grouss Iwwerraschung war definitiv den Award fier d'Lana Del Rey als déi beschten Newcomerin. An eemol stoung och den George Michael op der Bühn. Nodeems de Sänger d'läscht Joër eng schwéier Longenentzündung hat, gouf hien mat Standing Ovations geéiert.
DE Skandal schlechthin war awer, wou d'Adele a senger Ried ënnerbrach gin ass, nëmmen fir dass Blur hiren 15 Minutten laangen Medley spille konnten.De Public war domadder guer net averstanen an huet zimlech haart gepaff. Leider huet een dovunner op der Tele net besonnesch vill matkrut a wéi dat näischt gehollef huet, si vill Leit einfach geflücht - wat hinnen net ze veriwwelen ass, well wann een net grad hardcore Brit-Pop Fan ass, huet een vläit grad mol een vun de Lidder vu Blur kannt.
Trotz dem onzefriddestellenden Schluss war et ë gelongenen Owend a fir mech war et definitiv net déi läschte Kéier bei de Brit Awards!
