„Europe's Most Wanted Cup“25 „Most Wanted“ gi mat Sammelbiller gesicht

Passend zur WM wëllt Europol déi 25 meeschtgesichte Verbriecher an Europa mat enger Zort Online-Sammelalbum fannen.

Leschten Update: 12.07.2018, 11:24:29

© eumostwanted.eu

D'Ekippe fir d'WM-Finall sti fest, gläich ass se fäerdeg an déi, déi hire Panini-Albun nach net voll hunn, musse spéitst elo Gas ginn. Ma wien e scho voll huet an sech langweilt, dee kann elo weider sammelen, an zwar déi 25 am meeschte gesichte Verbriecher an Europa.


Top-Gesichten-Ekipp zesummesammelen

Et fält direkt d'Ähnlechkeet zu de bekannte Sammelbiller op, Europol mécht awer aus deem ganzen éischter e Spill. Vun den Donneschdeg un gëtt et op de verschiddene soziale Medien ëmmer erëm Coden, mat deenen een um Europol-Site d'Billercher ka fräischalten.

Virdrun, ass nëmmen den Hannergrond vum Bild an d'Nationalitéit vum Gesichten ze gesinn. Et geet also, d'selwecht wéi beim Fussball-Virbild drëms, fir sech seng Top-Gesichten-Ekipp quasi zesummenzesammelen. Dorënner ass iwwregens och e Gesichten aus Lëtzebuerg.





Mord, Iwwerfäll, Drogen a Bedruch

Gesicht ginn d'Persounen ënner anerem wéinst Mord, arméierten Iwwerfäll, Bedruch oder Drogenhandel. D'Code ginn et bis de Samschdeg. Eréischt, wann een all d'Persounen, an deem heite Sënn nennt Europol se „Spiller“, fonnt huet, ass d'Spill eriwwer an et kann een sech d'Lëscht eroflueden.

Hei de Reportage am Toun!


Den 20. Juli ginn dann och nach 25 Gewënner gezunn, déi e Geschenkkuerf vun Europol zegutt hunn. Ma wat soll dat ganzt kann een sech elo froen.

Gesiichter solle Leit a Gediechtnes bleiwen

Hannert där Aktioun stécht en eescht Uleies. An zwar sollen d'Leit sech d'Gesiichter vun de Gesichten esou besser mierke kënnen. Et hätt sech nämlech gewisen, dass een d'Visitten op der Europol-Säit misst héich halen, fir Resultater ze kréien. An dat géif am beschte mat méi originellen Aktioune goen.

Bei den zwou méi grousse Campagnë ronderëm Chrëschtdag 2016 an am August 2017 hätten am ganzen 9 gesichte Persoune kënne festgeholl ginn, nodeems si vu Leit identifizéiert gi waren.






 

Links