Fouer 2018Wat kaschten de Mini an de Fësch dëst Joer?

D'Fouer ass e Mekka fir Schneekegkeeten a richteg leckert Iessen. Wat kascht de ganze Spaass dann dës Editioun? Ass et méi deier ginn?

Leschten Update: 23.08.2018, 15:02:36

© Eldoradio Archiv

Wat ee méi al gëtt, wat d'Spiller op der Fouer net méi grad esou interessant sinn. Ma nieft den Attraktioune bitt d'Schueberfouer natierlech och gutt Iessen a Gedrénks. Eng klassesch Lëtzebuerger Grillwurscht kascht sou nach ëmmer tëscht 3 an 3,50€. D'Mettwurscht gëtt et fir 3,50, mee kann och an anere Buden 4€ kaschten. Den Hamburger variéiert tëscht 3,80 a 5€ a fir en Cheeseburger muss een dëst Joer tëscht 4,50 a 5,50€ op den Dësch leeën.

 

Déi beléifte Gromperekichelcher (3 Stéck) ginn et fir 4,50€ (ouni Kompott, dee kascht extra), op e puer Plaze sinn dës souguer 5€. D'Portioun Fritte schléit mat 3 bis 3,50€ an de Portmonnie. Eng Portioun Bami-Nuddele ginn et fir 5€. Fir all Fouer-Begeeschterten ass de gebakene Fësch e Must! Hei ass de Präis vu Bud zu Bud ënnerschiddlech. Bei verschiddene kritt een de komplette Fësch mat Fritten an Zalot fir 24,50€, bei anere muss ee scho mol bis zu 27,50€ op den Dësch leeën.

 

De Fësch eleng kritt ee schonns fir 21,80€. Wann ee de gebakene Fësch doheem genéisse wëll, da kritt een e schonns fir 17,10€. Hei lount et sech op alle Fall d'Präisser vun de Buden e bëssen ze vergläichen. Den Eisekuch mat Zocker ass fir 3€ ze kréien an eng Barquette Churros ginn et vun 4,50€ un. De kale Mini kritt ee vun 3€ un. An de Bude selwer variéiert de Präis liicht. D'Hunnegdrëpp ass vun 3€ un ze kréien an d'Cola am 0,4l schléit op puer Plaze mat 4,40€ an de Portmonnie.

D'Präisser fir dës Editioun!