De Mischlingsmupp Quasi Modo konnt de Contest dëst Joer fir sech entscheeden an dréit vun elo un den Titel "World's Ugliest Dog". Am ganze si 27 Hënn un den Depart gaang, ee méi elle wéi deen aneren. Erausgestach ass de Gewënner, e Mix aus Pitbull a Schéiferhond, awer duerch säi kromme Réck a säi relativ kuerze Kierper.

Fir d'Besëtzer, déi de Quasi Modo aus engem Déierenasyl geholl hunn, ass et e Präisgeld vun 1500 Dollar ginn. Et ass déi 2. Kéier, dass de Mupp beim Contest matgemaach huet. Bei der Gebuert koum et zu Komplikatiounen an d'Schied hunn dozou gefouert, dass de Réck vum Hond elo ze kleng wierkt...

Näischt desto trotz ass de Quasi Modo e frëndlechen a verspillte Mupp!

Beim Contest, deen elo scho vir déi 27. Kéier organiséiert ginn ass, ginn d'Déieren no Ausgesinn, Perséinlechkeet a Reaktioun vun de Leit ronderëm bewäert.