An der Nuecht vum Sonnden op e Méinden hunn eng Handvoll Wasserbüffel den Trafic op der Autobunn tëscht Langenfeld a Leverkusen gestéiert. Deiere waren owes aus hirer Wiss ausgebrach a kuerzerhand op d’Fuerbunn vun der A3 gelaf.

Wärend d'Police d‘Streck a béid Richtungen, mat Hëllef vun zwee Camionen déi op der Autobunn am Stau stoungen, gespaart huet, gouf de Leit geroden an hire Gefierer setzen ze bleiwen. Büffele gëllen zwar u sech als friddlech, sinn awer trotzdeem massiv Deiere mat geféierlechen Haaren.

Mat Policeautoen an engem improviséierte Käfeg sollten déi 5 Iwweltäter evakuéiert ginn. Dëst ass de Beamten awer net gelongen, sou dass d’Büffel-Famill schliisslech vun engem Veterinär huet missen ageschlof ginn. No enger opwenneger Rettungsaktioun mat engem Kran, enger sëllecher Unzuel vu Pompjeeën an engem Bauer goufen déi 5 schlussendlech zréck an d’Wiss transportéiert. E ganze Koup Mëscht an iwwer 10 Kilometer Stau hat sech bis dohin op der A3 ugesammelt.