Am Oktober wëll Russland déi éischt Campagne fir Massenimpfunge lancéieren. Wéi de russesche Gesondheetsminister Michail Muraschko matdeelt, wieren d'klinesch Tester mam Impfstoff ofgeschloss. Déi éischt Persounen déi geimpft ginn, wäerten Dokteren a Léierpersonal sinn.

Bis ewell gëtt et nach keen Impfstoff géint de Virus. Weltwäit gëtt un iwwer 100 méiglechen Impfstoffer gefuerscht. Dovun si 4 Stéck an der drëtter Phas deelt d'Weltgesondheetsorganisatioun WHO mat. Dräi ginn a China an een a Groussbritannien entwéckelt.

Den Tempo mat dem Russland den Impfstoff rausbrénge wëll, huet am Ausland d'Fro opkomme gelooss, op déi russesch Regierung Prestige iwwer Wëssenschaft a Sécherheet stellt. Russland huet no den USA, Brasilien an Indien déi meescht Infektioune virzeweisen. D'Zuel vun den Infektioune läit bei 845.443 a 14.058 Persounen hunn de Virus net iwwerlieft.