Dës Woch ass Schoulrentrée, ugefaange mat de Primärschoulen um Dënschdeg!

Iwwer 152.000 Schüler ginn dës Woch nees an d'Schoul, d'lescht Joer waren et  ronn 150.000. Wéi de Educatiounsministère matdeelt, sinn et iwwer 58.000 Kanner an der Primärschoul an iwwer 48.000 fir de Lycée - ëffentlech wéi privat. Ze preziséieren ass, dass bei den 152.153 Schüler och d'Erwuessenebildung an d'Sproochecoursë vum Institut national des langues mat dobäi sinn.

Beim Léierpersonal fir d'Grondschoul sinn et gutt 6.300 Enseignanten, an de Lycéeë si fir dës Rentrée 4.500 Proffe gezielt ginn. Am Fondamental gouf mat iwwer 80% méi weiblecht Personal gezielt, am Lycée ass d'Verdeelung méi ausgeglach. Ma och hei dominéieren déi weiblech Léierpersoune mat 52,4%.