Fir Emotiounen iwwer Facebook, Instagram a Co. eriwwer ze bréngen veränneren d’Leit hir Schrëftsprooch.

"Merciiiii!" Esou kéint et ausgesi wann een engem anere géigeniwwer richteg dankbar ass an dat iwwer déi sozial Netzwierker wëll kommunizéieren. Méi Vokale sollen eis nämlech hëllefen eis Emotiounen a geschriwwen Texter z iwwerdroen.

Fuerscher aus Vermont hunn Daten aus 8 Joer Twitter ausgewäert fir d’Relatioun tëscht der Schrëftsprooch an Emotiounen ze analyséieren. Dofir goufen 100 Milliarden englesch, spuenesch a portugisesch Tweets ënnert d’Lupp geholl. Däitlech ass virun allem ginn, dass d’Vervillfachung vu Vokalen dozou déngt eng Ausso ze verstäerken. Ass d’Haus net just grouss, mee richteg grouss, gëtt aus dem Wuert "huge", d’Wuert "huuuuuge".

Och ironesch oder sarkastesch Aussoe kënnen duerch méi Vokaler besser schrëftlech ausgedréckt ginn. Wann een dem Géigeniwwer zum Beispill soe wéilt, dass een eppes net gleeft géif een amplaz vu "natierlech" einfach "natiiiiierlech" schreiwen.

D’Fuerscher erkläre sech den Trend esou, dass ee beim schwätzen Informatiounen duerch d’Betounung anescht vermëttele kann, a schrëftlecher Form ginn déi vill verschidde Facettë séier veluer. Tippt een d’Wierder awer mat gedeente Vokalen, kéint een esou méi Emotiounen iwwermëttelen.

Duerch d’Analyse vun den Tweets gouf festgestallt, dass net just Vokale mee och Konsonante gedeent ginn an d’Wierder am Laf vun der Joren doduerch ëmmer méi absurd ginn. Am Joer 2008 gouf mat Wuertdeenungen- an Doppelunge wéi "hahaha" probéiert déi mëndlech Sproch ze imitéieren. Mëttlerweil kann een awer scho Kreatioune wéi "helpppp" oder "hellllp" guer net méi ausschwätzen. D’Wëssenschaftler schléissen doraus, dass et net méi just dorëms geet déi mëndlech Sproch ze imitéiere mee och d’Optik ze optiméieren. Dës Wierder, déi jo grammatikalesch net richteg sinn, géife mir vill méi séier erblécksen an deemno och méi Wäert drop leeën.