Dacks beweege mer eis net genuch am Alldag. Ma genee do soll d'40-15-5 Reegel awer hëllefen.

Den optimalen Aarbechtsrhythmus ass e bëssen den hellege Gral vum Alldag. Konzentréiert a motivéiert bleiwen, ouni ze vill um Stull ze hocken. Dofir probéieren och ëmmer méi Leit sech an der Mëttegpaus ze beweegen, oder mat Hëllef vun engem Stéi-Pult d'Zäit déi ee sëtzt, ze verkierzen. Mee dat kann net jidderee maachen. Wann dir dovu betraff sidd, da probéiert et mat der 40-15-5 Stonn.

Lauschtert hei eran!

Virun allem interessant un der 40-15-5 Reegel ass, dass een se och am Homeoffice applizéiere kann. A wat muss ee bei dëser Reegel iwwerhaapt maache? Ma ganz einfach: seng Stonn e bëssen anescht andeelen. Wärend 40 Minutten soll ee sëtzen, dann 15 Minutte stoen, a sech nach eemol fir 5 Minutten beweegen.

Um Büro kann et mam stoen deemno wéi méi schwiereg ginn, wann ee kee spezielle Büro huet bei deen ee sech och stelle kann. Ma doheem ass et do méi einfach: ee Regal oder eng Komoud an der richteger Héicht huet ee gäre mol iergendwou doheem stoen. Déi 5 Minutte beweege kënnen och ganz verschidden ausgesinn. Einfach ee kuerzen Tour virun d'Hausdier trëppele goen, oder um Büro ee méi laange Wee aschloe bis bei d'Kaffismaschinn. Fir dës 5 Minutte konsequent z'applizéiere, kann ee sech kleng Ritualer am Dag festleeën, duerch déi ee méi dacks opsteet.

Beweegen an och stoe si wichteg fir eis Blutt-Zirkulatioun. Deemno soll ee sech pro Woch tëscht 150-300 Minutte beweegen. Dat kann och scho séiert trëppele sinn, oder mam Vëlo fueren. Wien also keng Zäit huet fir bis an de Fitnessstudio ze fueren, fënnt sécher a sengem Alldag deen een oder anere Moment fir aktiv ze ginn. Wien iwwert déi 300 Minutten erauskënnt, reduzéiert de Risiko fir eng Partie Krankheete wéi Diabetis oder Daarmkriibs.