Den däitschen Duden huet dës Woch nei Wierder annoncéiert, déi elo an den Dictionnaire opgeholl ginn - an déi sinn immens vun der Coronakris gepräägt.

Rezent huet dat och den Zenter fir d'Lëtzebuerger Sprooch gemaach an de Lëtzebuerger Online Dictionnaire LOD ëm puer Begrëffer erweidert. Konkret ass e ganze Covid-19-Glossaire erstallt ginn. D'Sproochfuerschung ass en immens interessante Beräich a gëtt duerch gréisser Evenementer gepräägt – esou ass dat de Fall mat der Corona-Pandemie. De Virus verännert net just eisen Alldag, mee och eise Vokabulär. Um Internetsite vum LOD gouf dat passend zesummegefaasst:

"Mat der Pandemie koum de Lockdown. Deen hat Hamsterkeef an Homeoffice am Gepäck. Flatten the curve war de Mot d'ordre, dofir Homeschooling a Bingewatching, Onlineshopping a Maskeflicht. Mee wat de Replikatiounsfacteur méi erof-, wat de Wonsch no Exitstrategien a Lockerunge méi eropgeet."

Lauschtert eran!

Wierder, déi et Ufank des Joers esou nach net gi sinn oder déi ee selwer net benotzt huet, héiert een elo a praktesch all Conversatioun: asymptomatesch, Contact-Tracing, Hamsterkeef, Infektiounsketten oder och Reproduktiounswäert. Mat der neier Wuertlëscht ass de virusbedéngte sproochleche Wandel elo definitiv siichtbar an erméiglecht eis eng mi einfach Ausdrocksweis.

Nieft de genannte Begrëffer ginn et awer nach eng ganz Rëtsch, déi den neien Covid-19-Glossaire vervollstännegen: Caddieflicht, Eegenisolatioun, Frupstut, Outdoormusée oder och Zoonos. Mat verschiddene kann ee vläicht net direkt eppes ufänken, anerer klénge ganz skurril: Aplaz sech an den Aarm ze huelen, mécht een elo en Ieleboubump fir d'Gestes barrièren ze respektéieren.

Beim Revengeshopping geet et drëms, d'Zäit vun der Ausgangsspär ze kompenséieren. E Superspreader huet besser doheem ze bleiwen, well e fäeg ass, eng grouss Zuel vu Leit unzestiechen. Bei enger Watchparty kuckt een zesummen, mee virtuell mat Kollegen e Film an un engem Whatsappapero hutt dir sécher schonn deelgeholl. De Covidiot erkläert sech wuel vum selwen...