Am Lëtzebuergesche klengen dës Wierder Englesch, ma dat si se guer net...

Wann een e Kommentar bréngt, dee grad guer net era passt fanne mer dat "random" a wann eppes geschitt wat ee feiert da geheie mer en "nice" an de Raum. Englesch Begrëffer hu sech an eisen alldeegleche Sproochgebrauch geschlach an dat ass och normal. Ëmmerhin ass et eng Weltsprooch a mer sinn an de verschiddenste Beräicher mat Anglizisme konfrontéiert, do ass et da just eng Saach vun der Zäit, dass ee sech se och ausserhalb vun der Popkultur oder dem Beruff (verschiddener hätten do lo Job gesot) uneegent.

Heiansdo ginn et och einfach Ausdréck, déi sech net esou gutt an d'Lëtzebuergescht iwwersetze loossen also firwat net och mol eng aner Formuléierung dofir benotze wa se engem gefält. Allerdéngs ginn et och falsch Anglizismen, dat heescht Wierder, déi sech zwar englesch unhéiere ma et guer net sinn. Ier der engem Engleschsproochegen also dës Wierder un de Kapp geheit, checkt fir d'éischt emol ob se iwwerhaapt ausserhalb vun eisem Langage Sënn erginn.

Den Handy. D'Wuert klengt sou international, ma engem Englänner braucht der net ze soen, dass den Handy schellt. Handy heescht hei nämlech praktesch a falls der dat mobilt Gerät mengt, dat iwwersetzt der mat mobile (phone) oder wann der et mat engem Amerikaner ze dinn hutt mat cell (phone).

Och de Begrëff Oldtimer, wéi mir e kennen, ass e falschen Anglizismus. En "native speaker" géif dozou "vintage car" soen. An den USA bedeit "old timer" och nach eng al Persoun.

Mëttlerweil sinn et déi smart Vëloen do déi jiddereen doheem stoen huet, fréier waren et d'Hometrainer. Witzege Fakt, esou cool et klengt, de Begrëff "Hometrainer" gëtt et am Englesche guer net!

Eng engleschsproocheg Persoun zielt iech eppes vun engem Slip? Keng Angscht, dat huet absolut näischt mat Ënnerwäsch ze di mee mat engem Mëssgeschéck oder engem Keesse-Bong. Just bei eis an an de Nopeschlänner huet ee sech dee Begrëff Slip als Ënneschtbox duerchgesat.

Wien zu Lëtzebuerg Streetworker ass, dee schafft am soziale Beräich mat Leit vun/op der Strooss. Erzielt der dat engem Ami oder engem Britt versteet deen entweder näischt oder kéint et nach mat "streetwalker" verwiesselen, enger/engem Prostituéierter/Prostituéierten