No senger ausverkaafter Tour am Hierscht dëst Joer, kënnt den däitsche Kënschtler Schmyt am Fréijoer 2023 och bei eis op Lëtzebuerg!

Viru gutt zwee Joer huet de Sänger, Songwriter a Producer seng éischt Songs erausbruecht. Mëttlerweil gehéiert hien zu deenen ugesotsten Acts aus Däitschland. De Schmyt huet zesumme mat de Produzenten Bazzazian (Haftbefehlt) an Alexis Troy (RIN) e ganz eegene Sound entwéckelt a beweegt sech iergendwou tëschent Pop, Hip-Hop an R'n'B.

Mat senger gefeierter EP "Gift" gouf de Museker och fir de Preis für Popkultur, den New Music Award an d'1LIVE-Krone nominéiert. Am Mee vun dësem Joer huet de Schmyt dann direkt och säin Debut-Album "Universum regelt" erausbruecht.

E Beweis fir dem Schmyt säin Hype ass de Fait, dass seng Hierscht-Tournée déi hien elo am Oktober an November spillt quasi komplett ausverkaaft ass. 2023 geet hien am Fréijoer dann op en Neits op Tournée a wäert och Statioun bei eis zu Lëtzebuerg am Atelier maachen!

Datum: 30. Abrëll 2023
Ticketen: de Virverkaf leeft méindes den 22. August 2022 um 16:00 Auer un