Am eelste queere Club vun Däitschland dem "SchwuZ" gëtt dëse Weekend déck Party gemaach zesumme mat der neier Plack vum Lady Gaga.

D'Lady Gaga ass berüümt a berüchtegt dofir eng grouss Ënnerstëtzerin vun der LGBTQ Gemeinschaft ze sinn. Wéineg verwonnerlech vue, dass dem Lady Gaga seng Liewensphilosophie drop baséiert, dass jiddereen esou soll sinn a liewe wéi e sech gutt fënnt. A besonnesch fir Chromatica gëlt nees de Motto: Jiddereen ass wëllkomm! Wéi d'Gaga selwer sot, ass Chromatica eng eege Welt fir sech, wou kee jugéiert gëtt, a keen ze vill oder ze wéineg ass.

Fir d'Pride Week ze feieren, huet den eelsten däitsche queere Club "SchwuZ" sech dofir entscheed eng Chromatica-Streaming Party z'organiséieren. An dat och zesumme mam Musek-Label Universal. Ee ganzen Owend laang gëtt de Club a "Chromatica" verluecht, mat Dragqueens a passende Chromatica-Outfits, DJen, Gewënnspiller an natierlech vill Musek vum Lady Gaga. Et ass iwwregens net fir d'éischt, dass esou eng Show organiséiert gouf. Eréischt de 4. Juli gouf zu Bangkok eng Drag-Show zum Thema Chromatica ofgehalen, dat zesumme mat Universal Music Thailand.

Op spektakulär Kostümer dierf ee sech wuel och bei der Party am "SchwuZ" freeën / © Lillian SUWANRUMPHA / AFP

Eenzegen Nodeel: fir kënne live dobäi ze sinn, muss een an Däitschland wunnen.