Hautdesdaags probéiert iergendwéi quasi jiddereen, sech no baussen esou perfekt a feelerfräi ewéi méiglech ze weisen. D’Gesellschaft erlaabt dacks keng Feeler, obwuel d’Perfektioun net vun dëser Welt ass. Eng Approche déi vill Leit dozou bréngt sech bewosst oder onbewosst ze verstellen an deemno och onglécklech ze sinn, well bannendran si mer dach alleguer primitiv. Déi eng méi, déi aner manner.

A genau déi Primitivitéit loossen de Max an den Dani am Podcast eraus. Themen déi am Alldag fir Gespréich suergen, gräifen déi zwee op an thematiséieren déi op hir eegen Aart a Weis mat vill Witz a Gegecks. Déi zwee si Kapp an Aarsch, woubäi nach net kloer ass wien de Kapp ass. Dat bréngt mat sech, dass se vill zesummen erliewen, virun allem komesch an aussergewéinlech Situatiounen an déi se sech deemno och selwer era manövréieren.

Alles dat erwaart iech am Podcast Intensiv Primitiv.

All zweeten Donneschden kënnt eng nei Episod eraus.

Episod 13 - Wisou dadäiwel?

An der mëttlerweil 13er Episod vun Intensiv Primitiv, hunn de Max an den Dani sech am debattéiere probéiert an iwwert Thema geschwat wéi zum Beispill, de grousse Alkoholkonsum bei de Leit. Donierft ass de Max awer och um Sprong a Richtung Dublin, do huet hien nämlech eng potentiell Entrevue mam Conor Mcgregor an net ze vergiessen ass ee leschte wichtege Sujet an zwar d’Fussball-WM am Katar déi zum Schluss vum nächste Joer ass.