Hautdesdaags probéiert iergendwéi quasi jiddereen, sech no baussen esou perfekt a feelerfräi ewéi méiglech ze weisen. D’Gesellschaft erlaabt dacks keng Feeler, obwuel d’Perfektioun net vun dëser Welt ass. Eng Approche déi vill Leit dozou bréngt sech bewosst oder onbewosst ze verstellen an deemno och onglécklech ze sinn, well bannendran si mer dach alleguer primitiv. Déi eng méi, déi aner manner.

A genau déi Primitivitéit loossen de Max an den Dani am Podcast eraus. Themen déi am Alldag fir Gespréich suergen, gräifen déi zwee op an thematiséieren déi op hir eegen Aart a Weis mat vill Witz a Gegecks. Déi zwee si Kapp an Aarsch, woubäi nach net kloer ass wien de Kapp ass. Dat bréngt mat sech, dass se vill zesummen erliewen, virun allem komesch an aussergewéinlech Situatiounen an déi se sech deemno och selwer era manövréieren.

Alles dat erwaart iech am Podcast Intensiv Primitiv.

All zweeten Donneschden kënnt eng nei Episod eraus.

Lauschtert hei d'Episod

Episod 16 – Iwwert Capitani an Insel-Präisser

D’Episod 16 ass dann elo offiziell dobaussen an ass och ee Vidcast. D’Jonge vun Intensiv Primitiv kann een also och dëst Kéier net just lauschtere mee och kucken. An dëser Episod geet et dann ëm Aktuell Sujeten, wéi zum Beispill déi lëtzebuergesch Serie «Capitani», wéi ee sech op der Welt eng Insel kafe kann an a wéi enger Relatioun déi mat de Wunnengspräisser hei zu Lëtzebuerg stinn. Eng Thematik déi natierlech net einfach ze verdauen ass. Virun allem da wann ee bedenkt, dass ee fir de Präis vun engem Appartement zu Lëtzebuerg, op de Bahamas eng ganz Insel kafe kann.

Kuckt hei de Video