Dat ass eng eenzegaarteg Erfarung fir den Au Pair, awer och fir d’Famill, déi en ophëlt. Wat sinn d’Bedéngungen? Wéi eng Kontakter ginn et?

Lauschtert hei déi ganz Reportage!

Wann Dir am Groussherzogtum wunnt an Är Famill op d’mannst ee Kand ënner 13 Joer huet, kënnt oder Dir jonk Mënschen am Alter tëschent 18 an 29 Joer aus dem Ausland fir eng maximal Dauer vun 12 Méint wëllkomm heeschen. Grondviraussetzung: Dir hutt d’Méiglechkeet, där Persoun en eegent Zëmmer bereetzestellen.

D’Haaptzil vun dësem Au-pair-Openthalt ass de kulturellen Austausch: Au Pair a Gaaschtfamill profitéiere géigesäiteg dovun. Am Alldag muss d’Betreiung vun de Kanner (mat 25 Stonnen d’Woch) an alles, wat domat verbonnen ass, Virrang hunn: se wäschen an undinn, se an d’Schoul begleeden, hinne bei hiren Hausaufgaben hëllefen, mat hinne spillen asw.

Fir déi jonk Persoun ass Au Pair virun allem eng lounend Erfarung an d’Méiglechkeet, seng sproochlech a kulturell Kenntnisser ze verbesseren. Se gëtt an der Gaaschtfamill ënnerbruecht a kritt z’iessen, wat hir d’Méiglechkeet bitt, an e sproochlecht Ëmfeld anzetauchen an u kulturellen Aktivitéiten deelzehuelen.

Fir d’Famill ass dat d’Méiglechkeet, e jonken Auslänner als vollwäertege Familljemember opzehuelen an eng neier Kultur kennenzeléieren.

Awer opgepasst! D’Rekrutéierungsphas ass vun entscheedender Bedeitung. Dat ass d’Geleeënheet, d’Bezéiung ze testen. Dat ka live iwwer Skype, um Telefon oder per E‑Mail erfollegen. D’Kanner kënnen och mat abezu ginn an hirersäits Froe stelle an/oder dem zukünftegen Au Pair hi Bedenke matdeelen. Et geet net nëmmen ëm e Virstellungsgespréich, mä virun allem dorëm, Är Affinitéiten ze beurteelen an eng genee Virstellung vun senger Perséinlechkeet ze kréien. E jonke Mënsch kann e super Liewenslaf hunn, Är Erwaardungen op den éischte Bléck erfëllen, awer net mat Äre Kanner, Ärem Liewensstil oder mëttel- oder laangfristegen Ziler kompatibel sinn.

Op administrativer Säit ass et den nationale Jugenddéngscht (SNJ), dee sech ëm de rechtleche Kader këmmert an d’Demanden am Zesummenhang mam Au-Pair-System zu Lëtzebuerg këmmert. E bleift d’Kontroll- a Geneemegungsagence fir Akten a formellen Demanden am Kader vum „Au-Pair-Empfangssystem“.  Dir braucht och en „Au-Pair-Empfangsofkommes“, dat tëschent der Gaaschtfamill an dem jonken Au Pair vir senger Ukonft ënnerschriwwe muss ginn. Dës Dokument enthält d’Openthaltsbedéngungen: Openthaltsdauer, Aarbechtszäiten, Congésdeeg, Ënnerkonftsbedéngungen, vun der Famill finanzéiert Sproochecoursen, Täschegeld asw. De Vertrag muss an dräi Exemplairen ausgefëllt an ënnerschriwwe ginn: ee fir d’Gaaschtfamill, ee fir den Au Pair a schliisslech eng drëtt Kopie fir den SNJ. D’Openthaltsdauer zu Lëtzebuerg däerf ee Joer net iwwerschreiden.

Geméiss de lëtzebuergesche Virschrëfte kréien Au-Paire vun hirer Gaaschtfamill e gewësse Betrag Täschegeld, deen engem Fënneftel vun der Mindestgrondpai entsprécht an all Joer nei bewäert gëtt. Dat entsprécht haut engem Betrag vun ongeféier 440 € de Mount. D’Täschegeld ënnerläit net den allgemenge Steieren a Sozialversécherungsausgaben, déi op Paien erhuewe ginn.