Mr Science, ech hu gelies, dass Gin Tonic géint Heeschnapp hëllefe soll. Ginn et dofir wëssenschaftlech Beweiser?

Dofir ginn et absolut keng Beweiser. Dëst Gerücht zirkuléiert an de Medien, zënter dass déi britesch Organisatioun Asthma UK an enger Studie gesot huet: verschidden Zorte vun alkoholescht Gedrénks wéi Wäin oder Béier géifen Asthmasymptomer ausléisen. Aner Zorte wéi Gin oder Vodka géifen dat net maachen. Doraus ze schléissen, dass Gin Tonic géint Heeschnapp hëlleft, ass schonn zimmlech gewot. Asthma ass nämlech net dat selwecht wéi Heeschnapp. An eng Substanz gëtt och nach laang net zum Heelmëttel nëmme well se eng Krankheet net verstäerkt. Ganz am Contraire: Alkohol kann – souwuel bei Allergiker wéi och bei Net-Allergiker d'Nues effektiv zum Lafe bréngen.

Ma firwat ass dat esou?

Engersäits enthale verschidden Drinks e Stoff, deen Histamin heescht. D'Hormon spillt net nëmmen an eisem Immunsystem eng Roll, mee och bei allergesche Reaktiounen. An de Wäin an an de Béier kënnt et duerch Mikroorganismen, déi et och hierstelle kënnen. Verschidde Leit reagéieren och empfindlech op Sulfiten. Mat dëse Schwiewelverbindunge gëtt beispillsweis de Wäin haltbar gemaach. Dës entstinn awer och op natierlech Aart a Weis bei der Gärung. Klassesch gebrannten Alkohol ouni esou eng Inhaltstoffer kann d'Schläimhait och zum Uschwëlle bréngen. Dat nennt een en Alkoholschnapp oder medezinesch korrekt e vasomotoresche Schnapp. Dass Vodka, Gin a Co par contre géint Heeschnapp wierken oder en ausléisen, ass net bewisen.

Lauschtert eran