Grad fierft d'Fréijoer d'Landschaft erëm zaart gréng. Firwat si Blieder a Grashällem dann awer dacks vill méi hell wéi am Summer?

Fir dee grénge Faarfstoff Chlorophyll oder grénge Blatstoff ze bilden, brauchen d'Planze verschidde Mineralstoffer wéi Eisen, Magnesium a Mangan. Si zéien dës mam Waasser aus dem Buedem an transportéieren se an d'Blieder. Do verdonst d'Waasser a gëtt dobäi d'Mineralien of. Dëse Prozess leeft am Fréijoer un. Am Ufank ass also nach net vill Chlorophyll am Blat. Dofir enthält et awer méi giel Carotinoiden. (3) Dës Faarfstoffer ënnerstëtzen de Chlorophyll bei senger Aarbecht a schützen e virun ze vill Liicht. Dat Gielt mëscht sech dobäi mam frësche Gréng a léisst d'Blat hellgréng ausgesinn. Ausserdeem sinn déi jonk Blieder nach esou zaart, dass méi Liicht doduerch schéngt. Am Summer hëlt de Chlorophyll iwwerhand a léisst d'Wisen an d'Bëscher donkelgréng ausgesinn.

Firwat sinn d'Blieder iwwerhaapt gréng an net z. B. blo?

De grénge Chlorophyll fänkt Sonneliicht an a benotzt déi doran enthalen Energie, fir aus Loft, Waasser a Mineralstoffer Narung fir d'Planzen hierzestellen. D'Biologen nennen dat d'Photosynthees.

D'Sonneliicht setzt sech jo aus ville verschidde Faarwen zesummen – an zwar d'Faarwen aus dem Reebou. Bei der Photosynthees fänkt de Chlorophyll virun allem déi rout an déi blo Undeeler vum Liicht an an absorbéiert se. Mat deene gréngen Undeeler vum Liicht kann de Chlorophyll allerdéngs net vill ufänken. De Chlorophyll reflektéiert also dat gréngt Liicht. Eis Aen huelen et op, an eist Gehier seet: Planze si gréng.

Lauschtert eran