Am Hierscht sti se nees an de Restauranten op der Kaart: Mullen. Mä firwat kommen d'Muschelen eréischt am September nees op den Dësch?

Lauschtert eran!

Et ginn dräi Haaptgrënn, firwat frësch Mulle virun allem an de Méint mat engem „r“ – also vu September bis Abrëll – op den Dësch kommen. Deen éischten ass hiert Fleesch, dat vill Eewäiss enthält. Dat gëtt séier schlecht, esou datt d'Déieren traditionell lieweg vun der Recolte bis an d'Kachdëppen transportéiert ginn. Dat war fréier, wou se an de waarme Summerméint nach net richteg gekillt konnte ginn, net wierklech méiglech.

Dat dierft haut jo awer kee Problem méi sinn.

Richteg. Och wann et haut d'ganzt Joer virgekachten an déifgefruere Mulle ginn, gëtt de Gros awer nach ëmmer lieweg vun do, wou se gefaange ginn, bis an d'Kachdëppen transportéiert. An hei kënnt den zweete Grond an d'Spill: Am Summer hu Mullen einfach manner Muskelfleesch, well si Energie fir d'Reproduktioun brauchen. All weiblech Muschel leet da bis zu zwielef Milliounen Eeër an d'Waasser, déi vun der Spermawollek vun de Männercher befrucht ginn. Dat ass e grousse kierperlechen Effort an ziert un de Reserve vun de klengen Déieren.

A wat ass den drëtte Grond?

Dee betrëfft d'Fudder: D'Algebléi kann an der waarmer Joreszäit gëfteg Stoffer produzéieren, déi d'Muschelen aus dem Waasser filteren an am Fleesch uräicheren. Eng Muschelvergëftung wier d'Konsequenz heivun an dat ass net besonnesch spaasseg fir de Mullegourmet. Dowéinst schreift d'Gesetz et och vir, dass Muschelen op esou Gëfter musse getest ginn, ier se an de Verkaf ginn.

Da genéisst är nächst Portioun frësch Mullen!