Et si Begrëffer déi Lëtzebuerg brauch an awer gëtt et kee Wuert dofir! D'Morningshow wëll dat änneren.

Um Freiden hunn d'Chich an de Charel der lëtzebuergescher Sproch de Kampf ugesot. Elo gëtt sech mol fir déi Begrëffer agesat déi et net an eiser Sproch ginn. Packen si et dës esouguer an den Dictionnaire ze bréngen?

Dofir muss als éischt mol gebrainstormed oder éischter gehierstuermt ginn, wéi eng Wierder onbedéngt mussen agefouert ginn. Dobäi huet d'Eldoland gehollef a folgend Lëscht ass zesumme komm:

Bestietnisufro = Heiratsantrag

Jo et gëtt kee Wuert fir "Heiratsantrag". Zwar kann e vun der Verlobung schwätzen, mee dat geet net duer fir ze erzielen datt de Pierre dem Claudine eng Bestiednisufro gemaach huet, ganz romantesch um Strand wärend dem Sonnenënnergang. Mee si mer éierlech ... weder Bestietnisufro nach Heiratsantrag klengt sexy.

Eenhar = Einhorn

Villäicht existéieren Einhörner wierklech net.... An awer existéiert de Begrëff, just net op Lëtzebuergesch. Gëtt dach Zäit fir d'Wuert Eenhar an d'Wierderbuch opzehuelen?

Cyber Raiber = Hacker

Ok... Hacker gëtt et zwar am Dictionnaire, mee d'Crew aus dem labbere Feierowend Chris a Cédric, hunn definitiv de méi coolen Numm fonnt: Cyber Raiber. Och wann net zwéngend all Hacker kriminell ass, ass et awer sécher de coolsten Numm.

Hëtzttirang = Wärmeschublade

Si mer éierlech, déi mannst wëssen em wat et sech hei handelt. Mee fir d'Laura ass et e reelle Problem: Seng Kichen huet eng Wärmeschublade an hatt huet keen offiziellen Numm dofir: Hëtzttirang?

lieben = ech hunn dech gär

"Ech hunn dech gär" ass zwar lëtzebuergesch an existéiert och am Dictionnaire. Mee ass dat dat Héchst vun eise Gefiller? Seet dat wierklech esouvill aus wéi: I love You? D'Fro ass just sollt een elo "lieben" oder "léiwen" soen?

Wat de Lëtzebuerger Online Dictionnaire wuel zu eise Propose wäert soen?

Mir fannen et raus a wäerten eng Demande maache fir déi Wierder offiziell opzehuelen.

Also Dommen drécken!

Ärt Morningshow-Team, Chich a Charel